I CARIOTI DEL PIAVE

Zente forte visi scuri dal sol,
co le rughe su la front;
in testa un capel sagomá,
dal sudor, da la polvere, e dal vento del Piave.
Brassi muscolosi, e man pien de cai;
se i vedea passar col so caval
atacá al caro co le sponde o co le baree
per andar a caricar la gera sul Piave.
Badie lustre che sluseghea al sol,
un toco de rete su un teler
par pasar la gera, i andea
e vegnea da la matina a la sera.
Tute le strade alora le jera bianche,
su le rive dei fossi visin na pasada
sti bravi carioti i scarichea ná gerada
che servia ai stradini a ingerar
in autunno e primavera.
Adesso le strade xe tute sfaltade
i fossai tombadi mexi stropadi,
musigne co griglie piene de scoasse;
ma soto la crosta de sto asfalto nero
xe restà quea gera bianca,
"l'anema "de quei bravi carioti

AVANTI

PAGINA PRINCIPALE