EL SCARPER

Anca sto'mestier da ani,
al xe spario dai nostri paesi;
le vecie botteghe col picolo banchet
cargo de atressi de broche e ciodin,
de spaghi impegoa, de sentene,
de forme de legno e de fero
che servia par giustar le scarpe.
Adesso la xe passada al museo
questa vecia arte,
al progresso al gá messo da parte
sto'mestier de giustar le scarpe;
quando che le se rompe se le buta via
semo tuti siori, no xe pi carestia.
Me ricordo quee botteghe piene
de socoi da cambiar el legno,
de scarpe sbusade da meter
la siola, e'l tac, o rote la ponta,
bisognea farghe la rimonta.
El scarper al gavea sempre la gola seca,
metendo le siole vegnea fora quea polvereta,
e cussi al fea festa al lunedì
onorando al so'patron "S. Crispin ",
bevendo qua'e la'qualche ombrata de vin.
Penso che sti anni grassi stae par finir,
e saria un ben par tuti che fra i zoveni
qualcheduno imparasse da novo sto'mestier,
forse par al "domila"tornará utile el scarper.

AVANTI

PAGINA PRINCIPALE